საქართველოს შრომის, ჯანმრთელობისა და სოციალური დაცვის სამინისტროს
სოციალური დაცვის დეპარტამენტის უფროსს ქალბატონ ნინო ოდიშარიას

ამავე დეპარტამენტის სოციალურ საკითხთა და პროგრამების სამმართველოს უფროსის მოვალეობის შემსრულებლის ნინო ჯინჯოლავას

მოხსენებითი ბარათი

 

ქალბატონო ნინო,

 

როგორც მოგეხსენებთ, საქართველოს შრომის, ჯანმრთელობისა და სოციალური დაცვის მინისტრის მიმდინარე წლის 20 ივლისის № 01-193/მ ბრძანების საფუზველზე,  23-28 ივლისს სამმართველოს მთავარი სპეციალისტი - ნატო ჩაფიძე იმყოფებოდა პოლონეთის რესპუბლიკაში. ვიზიტის მიზანი იყო პოლონეთის დედოფლის წმ. იადვიგას სახელობის ფონდის პროექტის - „შშმ პირთა პროფესიული და საზოგადოებრივი რეინტეგრაციის ცენტრის მოდელის შექმნისათვის საჭირო რეკომენდაციების შემუშავებაში“ მონაწილეობის მიღება და მათთან არსებული ოკუპაციური თერაპიის, პროფესიული აქტივობის თერაპიული ცენტრების, პროფესიული აქტივობის საწარმოების, კლუბების, საზოგადებრივი ინტეგრაციის ცენტრების და სოციალური საწარმოების მონახულება. პროექტი დაფინანსებულია  პოლონეთის საგარეო საქმეთა სამინისტროს განვითარების პროგრამის პოლონეთის დახმარების ფარგლებში. ვიზიტზე იმყოფებოდა სოციალური მომსახურების სააგენტოს, ასევე განათლებისა და მეცნიერების სამინისტროს პროფესიული განვითარების ცენტრისა და წყალტუბოს მუნიციპალიტეტის თანამშრომლები. პროექტის მიზანია, შშმ პირთა დღისა და სარეაბილიტაციო ცენტრებში გარემოს ადაპტაციისა და მცირე სახელოსნოების განვითარების საკითხებში პოლონეთის პრაქტიკის გაზიარება.
საგურამოს ბავშვთა სახლის ბაზაზე, რომელის აღდგენაზე მუშაობს სოციალური მომსახურების სააგენტო და ლიბერთი ბანკი, იგეგმება ევროპული დონის დღის ცენტრისა და შეზღუდული შესაძლებლობის მქონე ბავშვებისთვის მცირე სარეაბილიტაციო ცენტრის გახსნა, ასევე მომავლისთვის დაგეგმილია ამ ტერიტორიაზე მცირე სახელოსნოების (მებაღეობა, ლანდშაფტის დეკორატიული მოწყობა, თიხის სახელოსნო, კატერინგი - სამზარეულო საქმე და ა.შ.) განვითარება. აღნიშნული ვიზიტი დაიგეგმა საგურამოს განვითარების მიზნით. ვიზიტის მონაწილეებმა მიიღეს ინფორმაცია, თუ როგორ არის აღნიშნული სისტემა განვითარებული პოლონეთში, სადაც ბოლო წლებში მოხდა ღრმა ცვლილებები  სოციალური გარიყულების (მათ შორის შშმ პირებისადმი) საკითხებთან დაკავშირებულ მიდგომებში. განსაკუთრებით მნიშვნელოვანია ის, რომ პოლონეთში შშმ პირთა მხარდაჭერის და სოციალური ეკონომიკის სისტემები დაახლოვდა. ამ ორი სისტემის ოპტიმალური შერწყმა, აერთიანებს ოკუპაციური თერაპიის, პროფესიული აქტივობის თერაპიული ცენტრებს, პროფესიული აქტივობის საწარმოებს, კლუბებს, საზოგადებრივი ინტეგრაციის ცენტრებს და სოციალურ საწარმოებს. პირველი ორი მათგანი შექმნილია შშმ პირთა, დანარჩენი კი სხვა სოციალურ გარიყულობის საშიშროების წინ მდგომი ჯგუფების მხარდასაჭერად. ყველა ჩამოთვლილი ობიექტის სახეობა წარმოადგენს სოციალური ეკონომიკის სუბიექტს. მათი დაფინანსების ძირითადი წყაროა ადგილობრივი თვითმმართველობები.

სამომავლოდ იგეგმება პოლონელი ექსპერტების ვიზიტი საქართველოში, ასევე სასწავლო ვიზიტი პოლონეთში. მიღებული ინფორმაცია საქართველოს მხარეს ხელს შეუწყობს შშმ პირთა რეაბილიტაციის და ინტეგრაციის ცენტრის მოდელის შექმნაში.

დანართის სახით წარმოგიდგენთ მოხსენებას „შშმ პირთა პროფესიული რეაბილიტაციის მხარდაჭერის სისტემა პოლონეთის საზოგადოებრივი და პროფესიული რეინტეგრაციის ცენტრებში,“ რომელშიც აღწერილია ოკუპაციური თერაპიის, პროფესიული აქტივობის თერაპიული ცენტრების, პროფესიული აქტივობის საწარმოების, კლუბების, საზოგადებრივი ინტეგრაციის ცენტრებისა და სოციალურ საწარმოების მუშაობის პრინციპები.

 

პატივისცემით,